Lindsay Lohan kvænist annarri konu

Í íslensku máli þá er það svo að konur kvænast aldrei, þær giftast. Þar sem um lesbískt hjónaband er að ræða þá er Lohan í rauninni að kvænast, hún er að ganga í hjónaband með annarri konu sem verður væntanlega í Kalíforníu. Það eru bara tvö ríki í U. S. sem leyfa hjónabönd samkynhneigðra. Massachusettes leyfði þau 2004 og nú Kalífornía um miðjan þennan mánuð. Hvað gerist í þessum málum hjá Lohan verður spennandi að sjá. Svona eins og í dæmigerðri sápuóperu!   

Lohan vill kvænast Samönthu Ronson

Vandræðagangur og vitleysa hjá Dr. Phil

Hversu oft hefur maður ekki horft á Dr. Phil og dáðst að því hversu frábær hann er að tala við fólk og hvernig honum tekst að leysa alls konar vanda með gestum sínum.  Það hefur þó komið fyrir að hann hefur vísað viðmælanda úr sjónvarpssal.  Þetta gerðist einu sinni hjá Dr. Phil: 

 

  

Svo er það viðtalið þar sem Dr. Phil lendir í hálfgerðum vandræðum og missir viðmælanda sinn alveg frá sér.  Ekki bjóst maður við því að sjá eitthvað þessu líkt: 

Endemis vandræðagangur! Ætli Oprah Winfrey hafi einhverntíma lent í einhverju svona? 

 

Heitasta umræðan á YouTube!

Það er heilmikil umræða í gangi á YouTube í tengslum við það sem þú getur séð á þessu myndsskeiði.  Dæmi hver fyrir sig. 

 

 

 

 

Þetta er margfalt maraþon!

Hlaupið milli Aþenu og Spörtu er rosalega langt!  Menn hafa 36 klukkutíma til þess að klára það. Þetta er allt annað en að hlaupa um á Borgundarhólminum. Leiðin liggur m.a. yfir 1.200 metra hátt fjall þar sem göngustígur er enginn og þar er mjög vindasamt, auk þess sem það er komin nótt þegar menn ætla að fara yfir fjallið. Þá er hlaupið yfir akra, meðfram hlíðum og yfir drullusvað, en það rignir iðulega á meðan á hlaupinu stendur. Aðeins þriðjungur þeirra sem hefja hlaupið ná að klára það. Það eru engin verðlaun í þessu hlaupi.  Aðalatriðið er einungis að ná að klára það. 

Það er nógu erfitt fyrir flesta að komast í þann gírinn að geta hlaupið 10 kílómetra, en hvað þá að hlaupa í heilan sólarhring og það margfalt maraþon.  Best að óska Gunnlaugi Júlussyni góðs gengis í þessu hlaupi. 

Hljóp 218 km á 24 klukkustundum

Vandræðalegt viðtal við David Schirmer

Hefur þú lesið bók sem heitir The Secret?  Þessi bók hefur  vakið heimsathygli og verið  þýdd á ótal tungumál. Á íslensku heitir hún Leyndarmálið. Samhliða þessari bók hefur verið gefinn út DVD diskur þar sem sama fólk og birtist í bókinni er að segja frá leyndarmáli sem hefur verið til í 2000 ár. 

Til þess að rifja í stuttu máli upp hugmyndina um þetta leyndarmál, þá snýst það um það að þú getir fengið allt það sem þig langar í. Það eina sem þú þarft að gera er að óska þér, trúa því að þér hafi hlotnast það og þvælast svo ekki fyrir alheimskraftinum meðan hann er að framkvæma óskina. Þannig getur þú óskað þér hvers sem er, spurningin er einungis hvað það er sem þú vilt að þér hlotnist. Ást, hamingja, betra hjónaband, peningar, hús eða frægð. Þú ert þannig það sem þú hugsar og dregur að þér hluti samkvæmt þínum eigin hugsanagangi. Alheimurinn gerir engan greinarmun á neikvæðum eða jákvæðum hugsunum. Þú færð það sem þú biður um, hvort sem þú hefur vitund um það eður ei. Þess vegna er best að vera jákvæður og draga að sér eitthvað gott! Eða svo segir þessi speki. Ok, dók. 

Þá er það vandræðagangur sumra sem tengjast Leyndarmálinu. Einn af þeim sem sjást á DVD disknum og birtist einnig í bókinni er David Schirmer. Þessi maður er þekktur fjárfestir í Ástralíu og milljónamæringur. Hann á stórt hús, tennisvöll, sundlaug, og fallegan garð svo eitthvað sé nefnt. 

Það sem skeði á síðasta ári í lífi þessa manns er að hann tók að fjárfesta fyrir fólk fyrir tugi þúsunda og jafnvel allt að 100.000 dollara. Öllu þessu fólki lofaði hann hagnaði en síðan gerðist ekki neitt og það veit enginn hvað varð um alla peningana. Í íslenskum krónum þá erum við að tala um fleiri milljónir íslenskra króna.  Þá skuldar hann einnig starfsfólki sínu laun.  

Sjónvarpsviðtal sem tekið var við Schirmer á síðasta ári í tengslum við þessi fjármál  er hið vandræðalegasta sem hægt er að finna á YouTube svo víða væri leitað. Undir lok þessa viðtals lofar Schirmer því að borga fólkinu til baka þann pening sem hann skuldar því, en heilu ári eftir þetta viðtal, hefur ekkert bólað á endurgreiðslum og hann neitar öllum viðtölum. 

 

 

Það er eins og það vanti alla hugmynd um kærleika gagnvart náunganum í leyndarmálið. Allavega virðist það vera svo hjá David Schirmer. 

Til hamingju með frábæran flutning Friðrik og Regína.

Eurobandið var mjög flott á sviðinu og það var greinilegt að þau nutu þess í botn að vera þarna. Lagið er taktfast og flott. Þess vegna var það eitthvað svo skrítið að horfa á atkvæðagreiðsluna og sjá Röðul rugludall frá Spáni vera með fleiri stig eða alveg þangað til Danirnir komu og gáfu okkur 12 stig. Lag Spánar er mun nær gríni heldur en alvöru og alls ekki eins taktfast og vel sungið og hið íslenska.  Athyglisvert að bæði Frakkar og Þjóðverjar skuli syngja á ensku, eins og þessar þjóðir eru stoltar af tungumálinu sínu. Hvað er síðan orðið af Ítalíu í tengslum við þessa keppni? Eitthvað fer lítið fyrir þeim þessi árin. 

Að hugsa sér hvað löndum hefur fjölgað í þessari keppni. Við erum komin alveg að Kaspíahafi hvað varðar fjarlægðir. Hvenær skyldi Kazaksstan koma og taka þátt? eða Sýrland? Það land er bara rétt fyrir ofan Ísrael og við landamæri Tyrklands.

 

Íslenska lagið átti betra skilið

Hinn mikli sjónvarpsprédikari og gróðafíkill

Sumarið 1995 kom sjónvarpsprédikarinn Benny Hinn til Íslands og stóð fyrir samkomum í Laugardalshöllinni. Fjölmargir lögðu þá leið sína í höllina og var hún strax á fyrstu samkomu smekkfull af fólki.  Benny Hinn hafði þá til þess dags og gerir enn, staðið fyrir lækningaherferðum þar sem margur hefur talið sig hafa fengið bót meina sinna, og mætt upp á svið til Hinn grátandi eða í ofboðslegri gleði. Á meðan fullt af fólki mætti í höllina til að sjá þennan athyglisverða prédikara,  þá fóru ýmsir aðrir beinustu leið og skrifuðu viðvörunarbréf í Morgunblaðið þess efnis að Hinn væri maður sem fólk ætti ekki að fara og sjá. Þarna væri kominn hinn mesti svindlari og miklu verra en það. 

Nú er Benny Hinn víst enn að störfum og það er hægt að fylgjast með honum á sjónvarpsstöðinni Omega á hverjum einasta degi. Og það er ekki bara Omega sem hefur Hinn á dagskrá hjá sér heldur ná sýningar frá samkomum hans til tæplega 200 landa og fleiri þúsundir manna sækja samkomur hans ár hvert. Fæstir vita hins vegar um það hversu mikil velta er í kringum þessa starfsemi. 

Samkvæmt bandarískum skattalögum þá þarf Hinn ekki að veita upplýsingar um bókhaldið hjá sér og sínu fyrirtæki þar sem fyrirtæki hans kallast trúarleg stofnun.  Þrátt fyrir það hafa lekið út ýmsar upplýsingar um eignir og eiginfjárstöðu Hinn og hversu miklu honum hefur tekist að eyða og þá meðal annars á dýrum hótelum. Þá erum við að tala um flottan lífsstíl. 

Benny Hinn er ekki fátækur maður. Hann á tveggja hæða einbýlishús við Kyrrhafið,  með 7 svefnherbergjum og 8 baðherbergjum, risastóran garð og sundlaug (svo eitthvað sé nefnt) sem metið er á 700 milljónir króna.  Hann ferðast um á einkaþotu sem kostar 8 milljónir íslenskar í rekstri á mánuði. Með henni fer Hinn í fjölda trúboðsferða á hverju ári, en hann lætur sér þá ekki duga að gista á ódýrum hótelum. Hann er þekktur fyrir að gista í konunglegum lúxussvítum þar sem ein nótt kostar allt að hálfa milljón eða meira.  Árið 2003 gisti hann t. d.  í stærsta hótelrými Evrópu sem staðsett er í Mílanó. Það er m. a. með arineldi, tyrknesku gufubaði, sánu og sundlaug. Nóttin þar kostar 10.800 dollara sem gerir svo lítið sem tæpar 800.000 krónur nóttin. 

Benny Hinn velur sér ekki ódýr föt til þess að fara í. Hann er þekktur fyrir að fara reglulega í dýrar fataverslanir í Beverly Hills svo sem Versace, Louis Vuitton og Bijan.  

Talið er að Benny Hinn Industries velti 100 til 150 milljónum dollara á hverju ári. Miðað við núverandi gengi þá gerir það árlega 7 til 10 milljarða íslenskra króna. Í hvað allur þessi peningur fer vita fæstir; það má ekki gefa það upp og Hinn neitar að mæta í viðtöl við sjónvarpsstöðvar.

Á sama tíma og Hinn ferðast um heiminn og eyðir stórfé á dýrum hótelherbergjum þá verður það enn undarlega sem hann segir við fólk á samkomum.  Hér koma nokkur dæmi:

Hinn spáði því fyrir 10 árum eða svo að mikil kreppa og erfiðleikar myndu eiga sér stað árið 2000. Aðeins þeir sem gæfu í ríki Guðs myndu lifa góðu lífi. Strax eftir þau orð voru tekin samskot...

Hinn hefur spáð því að Jesús komi til með að birtast líkamlega á sviðinu hjá sér á einhverri samkomunni. Reyndar hefur hann einnig spáð því að Jesús muni birtast líkamlega í ríkjum múslima.  

Hinn stóð ekki alls fyrir löngu á sviði fyrir framan fleiri þúsundir manna og lagði bölvun á alla þá sem myndu voga sér að segja nokkuð ljótt um starfsemi sína.

Svo að endingu hefur mönnum einhvern veginn tekist að finna kvittun sem hljóðar upp á 20 dollara frá Benny Hinn til heimilislausrar konu með eitt barn!

 

Þrír sjónvarpsprédikarar með bla bla bla

John McCain hefur hafnað stuðningi prédikarans John Hagee frá Texas. Hagee þessi er sjónvarpsprédikari sem veitir forstöðu stórri kirkju þar sem safnaðarmeðlimir skipta tugum þúsunda. Án þess að McCain gerði sér grein fyrir því fyrr en í síðustu viku þá mun Hagee hafa prédikað undir lok síðustu aldar um Hitler, gyðinga og Ísrael.  Þar segir Hagee að Guð hafi sent Hitler til þess að hjálpa gyðingum svo þeir gætu komist til fyrirheitna landsins. Guð hafi þannig beinlínis leyft helförinni að gerast og aðalmarkmiðið væri að gyðingaþjóðin kæmust til Ísraels. 

Hagee hefur áður verið stóryrtur og hefur hann m. a. sagt að kaþólska kirkjan væri hóran mikla og fellibylurinn Katrín væri svar Guðs gagnvart syndum samkynhneigðra.  Annar sjónvarpsprédikari Benny Hinn að nafni spáði því reyndar um miðjan síðasta áratug að samkynhneigðir myndu fá að kenna á reiði Guðs á þann veg að hann myndi eyða þeim öllum með miklum eldingum, og það fyrir aldamót. Það er samt önnur saga. 

McCain hafnaði þessum ummælum Hagee um gyðingana út frá þeirri forsendu að þau væru vitlaus, ótæk og óverjanleg. Þar að auki hefur McCain fundið sig knúinn til þess að biðja kaþólska afsökunnar á því að stuðningsmaður hans (Hagee) hafi sagt að kirkja þeirra væri hóran mikla, fölsk og um leið hættulegur trúarsöfnuður. 

Það er ekki bara það að McCain hafi fundið sig knúinn til þess að hafna stuðningi frá Hagee, því annar prédikari hefur einnig verið að hrekkja hann með ummælum sínum. Rod Parsley er sjónvarpsprédikari sem veitir 12.000 manna söfnuði forstöðu og lét hann þau orð flakka um daginn að Islam væri ofbeldisfull trúarbrögð og að þau væru af hinu illa.  Þar með fékk hann að fjúka sem stuðningsmaður McCain. 

Stutt er síðan Obama lenti í þeirri stöðu að stuðningsmaður hans, prédikarinn Jeremiah Wright hélt því fram að árásirnar 11. september hefðu verið bandarísk hryðjuverk. Obama hefur hafnað þessum ummælum þess efnis að þau tengist á nokkurn hátt hans viðhorfum.   Það er þó ekki svo að Obama hafi hafnað stuðningi Wright en það er einmitt það sem McCain gerir gagnvart Hagee og Parsley og þá í því skyni að skerpa á muninum milli sín og Obama.  Einmitt það gerir McCain e. t. v. að aðeins ákveðnari karakter en Obama og hugsanlega munu repúblikanar nota Wright málið gegn Obama þ. e. a. s. ef hann nær útnefningu demókrata.  

 

McCain hafnar ummælum prests

Er geimvera af eðlutegund í valdamesta embætti heims?

Bandaríkjamenn hafa sumir hverjir alveg stórfurðulegar hugmyndir um forseta sinn. Á sama tíma er menn með alls konar hugmyndir um samsæri fárra manna sem hafi hvað helst hug á því að stjórna heiminum. Nú er Bush forseti kallaður ýmsum nöfnum. Hann á að vera anti-kristur og satanisti sem á að hafa selt sál sína djöflinum. Svo dettur sumum í hug að hann sé einhvers konar geimvera af eðlukyni. Þannig séu allir í kringum hann í rauninni eðlur með löngun og þrá til þess að búa til lögregluríki á jörðinni.  Þáttastjórnandinn Larry King fær auk þess þann vafasama heiður að tilheyra þessu eðlusafni.   Ekki nóg með þetta heldur mun afi Bush, Prescott, hafa átt í leynimakki við Hitler sjálfan og skaffað honum peninga til styrjaldareksturs. 

Samsæriskenningar lifa núna góðu lífi í Bandaríkjunum. Það er ekkert mál að finna hitt og þetta um Bush feðga, 11. september og hugmyndir um fasisma þeirra fyrst nefndu. Lítið mál er að fletta þessu upp á YouTube og þar er hægt að finna misviturleg myndskeið í stórum stíl (sumt er svo illa gert og heimskulegt að það er ekki horfandi á það).  Þá er auk þess búið að gefa út þó nokkuð af DVD diskum þar sem Bush og öll hans ríkisstjórn er tekinn í bakaríið. Mynd Michael Moore Farenheit 911 er í þeim hópi ekki mjög hvöss ádeila á ríkisstjórn Bush. 

Útvarpsmaðurinn Alex Jones gaf út þriggja tíma disk fyrir tveimur árum sem heitir Terrorist Storm. Sú mynd er hvöss ádeila á ríkisstjórn Bush og þar er beinlínis sagt að árásin á Bandaríkin 11. september hafi verið að undirlægi Bandaríkjamanna sjálfra, til þess að réttlæta stríð og gera árás á Afganistan og Írak. Slíkt eiga Bandaríkjamenn víst að hafa gert áður eins og t.d. þegar skipið Lúsitanía var sent af stað á tímum fyrri heimsstyrjaldar með bæði fólk og vopnabirgðir um borð. Því var sökkt af Þjóðverjum og þar með höfðu Bandaríkin átyllu til þess að fara í stríð. Hitler á að hafa fundið sér átyllu til þess að ráðast á Pólland í seinna stríði en þá var fundinn pólskur karlmaður, hann klæddur í hermannaföt og skotinn. Síðan var látið líta út fyrir að hann hefði ætlað sér að gera árás á þýska varðstöð. Þjóðverjar höfðu þar með ástæðu til þess að ráðast á Pólland 1. september 1939.

Hvernig svo sem þessu er á botninn hvolft þá virðist Bush ekki njóta mikilla vinsælda sem forseti Bandaríkjanna. Hvað samsæris kenningar varðar, þá verður hver og einn að gera upp við sig hvað satt er í þeim efnum. Þær eru samt sumar hverjar alveg ferlega skrítnar.

 

Best að vera mjög varkár á netinu

 

Internetið er ábyggilega ein hin mesta bylting sem orðið hefur á undanförnum tæplega 20 árum eða svo.  Þróun netsins hefur verið alveg æðisleg. Nú er hægt að panta miða á leiksýningar, bíó, í flug og hvaðeina fyrir framan tölvuna, prenta út og fara svo. Borga alla reikninga....millifæra og æi lenda í glæpasamtökum og glata hrikalegum upphæðum á einum degi. Bara vegna þess að einum tölvupósti var svarað. 

Hér í gamla daga þá voru vírusar og vesen mest megnis vegna þess að einhverjir ungir tölvunördar út í heimi vildu láta bera á sér. Í dag eru heilu glæpasamtökin að störfum með öngulinn úti til þess að krækja í peninga grunlausra netnotenda. Spáið í því að það er sífellt verið að finna út nýjar leiðir til þess að plata fólk.  Samt virðist það vera svo, hver svo sem aðferðin kann að vera að grunnhugmyndin breytist mjög lítið. Iðulega er hún svona: Sendið okkur pening og þá færð þú eitthvað í staðinn  eða farið og sækið peninginn. Hér um árið létu t. d. nokkrir vesturlandabúar plata sig til Nigeríu til þess að sækja einhverjar fjárupphæðir.  Við komuna voru þeir rændir öllu og eða týndu jafnvel lífi. Þvílíkt vesen. 

Best er að virða ekki viðlits tölvupósta með boðum um vinnu, þátttöku í millifærslum einhvers konar, að leysa út happadrætti, né heldur boðum um að hjálpa einhverjum ókunnugum persónulega sem lent hefur í veseni og vantar aðstoð.  Hversu miklar líkur eru á því að maður útí heimi sem veit ekki hver þú ert, sé tilbúinn til þess að láta þig hafa peninga (í þóknun), jafnvel fúlgur fjár, þó svo að þú hafir hjálpað honum með einhverjum peningagjöfum?  Maður á aldrei að gera neitt fyrir neinn sem maður veit ekki hvort að geri eitthvað fyri einhvern yfirhöfuð eða m. o. ö. veit ekki hver er!

Varað við tölvupósti